Gov't to enforce tobacco billboard ban

Duha sa tulo ka suspetsado sa tulis sa usa ka negosyante sa milabay’ng gabii nasikop sa kapolisan sulod sa 23-oras nga hot pursuit operation sulod sa usa ka video karerahan sa Sitio Iba, Basak, Lapulapu.

Matud pa ni PO2 Elmer Canillo sa Theft and Robbery Section sa Lapulapu mihimo sila og hot pursuit operation human sa nahitabong pagtulis kang Cristopher dela Cruz, tigpatanto sa mga gagmay’ng tindera sa merkado.

Si PO2 Canillo miila sa mga nasikop nga mao si Harney Abasolo Cinco, 34, tag-iya sa video karera, Romar Gidlayan dela Paz, 30, ug William Cabasisi Orpio, 35, pulos mga residente sa Sitio Iba, Basak, Lapulapu ug usa ka Dante Inso Sarino, 29, taga Sitio Kagudoy, Basak, Lapulapu.

Ang upat nasikop sa kapolisan human nga usa ka residente sa maong dapit mitug-an nga ang motor nga gisakyan sa mga tulisan anaa sa maong dapit hinungdan sa ilang pagresponde ug pagkasikop sa mga suspetsado.

Atol sa maong operasyon, nakuha sa kapolisan ang usa ka unit sa video karera nga gipanag-iya ni Cinco ug gisignit ang tulo ka suspetsado nga nagduwa sa maong ilegal nga sugal.

Ang biktima nga si dela Cruz positibong miila nila ni Cinco ug dela Paz nga maoy mitulis kaniya sa milabay’ng gabii sa Humayhumay Road, Pajo, Lapulapu ug nakuha gikan kaniya ang kapin sa P70 mil ug mga resibo sulod sa iyang bag human siya tioni sa mga suspetsado.

Ang upat ka suspetsado kasamtangang gidetiner sa kapolisan sa Lapulapu samtang gihikay pa ang kasong kalapasan sa balaod batok sa pagsugal, samtang si Cinco ug dela Paz mag-atubang og kasong robbery.

Ang salapi nga nakuha sa mga tulisan wala na mahibalik ngadto sa biktima.