Dili mag-apil-apil ang mga sakop sa Kilusang Mayo Uno (KMU) labot sa pagahimuong konsultasyon sa mga sakop sa Regional Tripartite Wages and Productivity Board (RTWPB) sa P75 minimum wage hike dinhi sa Central Visayas.
Si Wennie Badayos sa KMU Central Visayas miingon nga ang lakang nga pagahimuon sa RTWPB dili gyud nila suportahan tungod kay gamay ra kaayo kining maong umento sa suholan ngadto sa mga mamumuo.
Iyang giklaro nga sila sa ilang grupo ug sa ubang mga progresibong grupo mas mokumbate pa sa ilang pagduso sa P125 legislated wage hike ngadto sa Kongreso kini tungod kay ilang nakita nga makatabang sa mga mamumuo sa ilang mga suholan.
Gani, bisan pa man kun mohimo'g konsultasyon karong sunod bulan, ang RTWPB dinhi sa Sugbu labot sa giduso niining P75 nga umento wala silay pagahimuong lakang nga supakon kini o kaha mohimog rally, kini tungod kay mas gihatagan nila'g dakong pagtagad ang ilang giduso sa kongreso niadto pang milabay'ng tuig.
Hinuon, iyang gibasol ang maong buhatan gumikan kay naabtan na lang og tuig ang pagtuki niini wala gyud makahatag og dugang increase sa suholan sa mga mamumuo diin kusog man unta kayo ang pagsaka sa mga palaliton.