Botika pinagbayad ng danyos

Nagpahigayon na usab og inspeksyon ang kabomberohan sa dakbayan sa Sugbu ngadto sa mga lodging ug boarding houses sa siyudad.

Kini maoy gipahibalo ni Cebu City Fire Marshall Superintendent Ismael Codilla, subay usab sa nagkaduol na  nga pagbukas sa klase sunod buwan.

Tumong sa kabomberohan nga masegurong nakatuman sa Fire Code ang mga boarding ug lodging houses sa dakbayan.

Matud ni Codilla nga kadtong mapakyas pagtuman sa nalatid sa balaod ilang irekomendar nga pasirad-an.

Hinuon miingon ang fire marshal nga masunuron sa balaod ang mga lodging ug boarding houses sa siyudad.

Kini gibase ni Codilla sa nangaging pagpahigayon og inspeksyon sa iyang mga sakop ngadto sa kapin sa 200 ka boarding ug lodging houses sa dakbayan.

Bugtong wala ma-monitor ug ma-inspeksyon sa Cebu City Fire Department mao kadtong mga panimalay sa siyudad nga gihimo usab nga boarding houses ug gipaabangan sa mga tag-iya niini.

Gipasabot ni Codilla nga dili sila makadali-dali pagsulod sa maong mga panimalay kung walay moreklamo diha sa iyang buhatan.

Tambag ni Codilla sa mga tinun-an ilabi na kadtong gikan sa probinsya nga dili magpataka og abang sa ilang kapuy-an dinhi sa dakbayan.

Miingon si Codilla nga kinahanglang seguruhon una niini nga dunay klarong fire exit ang ilang abangan aron dunay kaagian panahon sa emerhensiya ilabi na sa sunog.

Sumala pa ni Codilla nga posibleng matapos na sunod buwan ang pagpahigayon og inspeksyon sa iyang mga sakop sa tanang mga boarding ug lodging houses dinhi sa siyudad.

Kini human miluwat og pasidaan si Kalihim Ricardo Puno sa Department of Interior and Local Government (DILG) nga silotan ang dili motuman sa lagda, aron dili masubli ang mga panghitabo sa sunog nga nag-angin sa ubay-ubay nga kinabuhi sa mga estudyante sa "student dormitory" sa Manila sa miaging tuig kay walay emergency exit.