Moving toward global banking compliance

Naglaraw ang Cebu City Police Office nga mohimo og kasabutan tali sa mga malls nga magtugot sa mga polis nga makadala-dala sa ilang armas sulod sa mga establisamento ilabi na panahon nga dunay alarma.

Si Comendador nagkanayon nga base sa legal opinion nga nakuha niya gikan sa abogadong polis nga si Sr. Insp. Christopher Ruiz, walay balaod nga nagdili sa mga polis nga makadala sa ilang mga armas bisan asang dapita bisan gawas na sa ilang hurisdiksyon.

Ang maong legal opinion gibase ni Ruiz sa kaso nila ni Pedro Entera ug Ignacio Montes kabahin sa pagdala og armas diin dunay gipagawas nga desisyon sa High Tribunal (Korte Suprema).

Pipila ka mga polis ang nangreklamo gumikan sa pagdili sa mga establisamentong makasulod samtang nagdala sa ilang armas tungod sa rason sa mga gwardiya nga alang daw sa seguridad.

Kini nahitabo bisan na gani nga dunay alarmang gitubag ang kapolisan diha sa maong mga establisamento.

Sama sa insidente sa pagpamusil diha sa usa ka mall sa north reclamation area niadtong milabay'ng semana diin mga gituuhang sakop sa Bloods ug Crips Gang ang nag-engkwentro ug duna usa nga namusil.

Hinuon wala niini maigo ang gipusil kundili ang usa ka kustomer nga babaye nga nagkaon diha sa restaurant sa maong mall. Mireklamo ang mga sakop sa Mabolo police station nga wala dayon sila pasudla sa mga gwardiya.

Ulahi nang nakahibalo ang tagdumala sa maong mall nga dunay naigo sa mga kustomer diha sa sulod.

Niadtong Enero ning tuiga, mipagawas og kamandoan ang Camp Crame nga nagmando sa ginsakupan sa pakig-coordinate sa mga mall security supervisors tungod sa insidente sa Ever Gotesco niadtong Disyembre 24, 2006.

Ang maong mall gitulis sa napulo ka mga lalaking nag-uniporme og polis ingon man SWAT ug miilad sa mga gwardiya sa pag-ingon nga duna silay gitubag nga alarma.

Nunot niini gikasabutan sa Police Regional Office 7 ug mall security agencies nga magtinabangay pinaagi sa pagpahibalo daan sa mga polis kung duna silay tuyo diha sa maong mga establisamento ug kinahanglang beripikado kini ngadto sa buhatan sa kapolisan.

Apan namatikdan sa kapolisan nga dunay mga krimen nga nanghitabo sulod sa maong mga establisamento bisan paman sa kahigpit sa mga security niini, kini sama sa pagpanguot, labni, pangilad ug uban pa.

Nunot niini buot ni Comendador nga dunay grupo sa mga gwardiya ug polis nga magpatrolya diha sa maong mga malls sanglit maisip nga pampubliko usab kining dapit.