Good cop, bad cop

Pasakaan  og kaso kadtong mga  prinsipal sa mga tunghaan ingon man mga magtutudlo  nga masakpang mangolekta og  mga bayranan  sa mga tinun-an sa elementarya ug sekondarya sa pampublikong tunghaan sa lalawigan sa Sugbu atol sa nagpadayong enrolment  hangtod  magsugod ang klase sa Hunyo 4,  sunod bulan.

Kini maoy gipahibalo ni Department of Education provincial school superintendent Ricaredo Borgonia gumikan kay dili siya buot nga mahitabo ang mga problema sa milabay nga tuig diin dunay mga magtutudlo ang gireklamo labot sa pagpangolekta ngadto sa tinun-an.

Matud pa ni Borgonia nga nunot niini, mihangyo siya sa mga sakop sa media sa pagpahibalo niini sa ingon kadtong mga ginikanan o tinun-an sa mga hilit nga lugar sa lalawigan sa Sugbu makahibalo niini.

Sumala pa niya nga kun ang mga tinun-an ug ginikanan makapamatuod ug dunay mga resibo o dokumento labot sa pagpangolekta sa mga  prinsipal ug magtutudlo gikinahanglan kini nga dalhon ang maong mga dukomento sa ilang buhatan aron ma-imbestigar kini.

Gipasabot niini nga ang ilang buhatan andam sa tanang higayon sa paghatag og ayuda sa mga ginikanan ug  tinun-an  gipaninglan atol sa enrolment ingon man amutan sa eskwelahan nga wala gitugot sa  Parents-Teachers Community Association (PTCA).

Iyang giklaro nga sila sa DepED giduso gyud nila ang palisiya nga dili kolektahan ang mga ginikanan o mga bata atol sa ilang pagpa-enrol ingon man panahon sa klase gawas lang kun nauyonan sa PTCA.