Mga residente daplin sa sapa kuyaw

Nagpabilin gihapon ang risgo sa mga namuyo daplin sa kasapaan dinhi sa dakbayan sa Sugbu niining pagsugod na sa panahon sa ting-uwan.

Kini tungod kay hangtod karon wala pay gihimong lakang ang kagamhanan sa siyu9dad pagpabalhin sa mga tawo nga namuyo daplin sa kasapaan nga namiligrong ianod kun dunay baha.

Nasayran nga ang dakbayan miila na sa mga panimalay daplin sa kasapaan nga kinahanglang panggub-ob tungod kay kini giingong nasulod sa danger zone.

Ang action officer sa Cebu City Disaster Coordinating Council (CCDC), konsehal Gerardo Carillo mitataw, nga mokapin sa 2,500 ka panimaay gikan sa 35 ka mga barangay sa dakbayan ang anaa gitukod sulod sa tulo ka metros gikan sa daplin sa sapa.

Gipasabot hinuon sa konsehal nga dili pa mabalhin ang namuyo sa nahisgotang mga panimalay tungod kay giandam pa sa siyudad ang relocation site niini.

Sa pagkakaron, ang CCDCC misugod na paghimo og monitoring sa pipila ka mga barangay nga gilikado sa pagbaha.

Gimanduan na usab ni Carillo ang kabarangayan sa dakbayan pagbanhaw sa disaster brigade niini aron dunay daling makatubag panahon sa emerhensiya.

Gawas sa mga pagbaha, gikabalak-an usab ang mga pagdahili sa yuta sa pipila ka mga barangay sa siyu9dad panahon sa ting-uwan.

Ang Mines and Geo-science Bureau (MGB-7) miila na samga barangay sa dakbayan nga dilikado sa landslide.

Kini naglakip sa Busay, Sirao, ug Binaliw ingon man ang Transcentral highway.