Real progress coming to Nueva Ecija?

Nagkagamay karon ang mamalit og mga karne ug isda diha sa Unit I, Carbon Public Market itandi sa nangaging katuigan.

Kini maoy gibutyag sa chairman sa Cebu Market Vendors Development Cooperative (CEMVEDCO) nga si Erwin Goc-ong.

Tungod niini, miminos usab ang halin sa dul-an sa 500 ka mga stall holders diha sa maong merkado publiko nga miresulta sa paghunong sa pipila sa pagpaninda.

Usa sa gitumbok nga hinungdan ni Goc-ong sa nagkagamay nga mangomprahay nga mosulod sa Unit I mao ang dul-an sa 500 ka mga vendors sa Unit II nga anaa na naninda sa karsada human usab masunog ang nahisgotang merkado niadtong 1998.

Sumala ni Goc-ong nga ang Unit I kaniadto makabaligya og 13 ngadto sa 15 mil ka manok matag adlaw, apan karon maayo na lang og kini mohalin og 3 mil ka manok matag adlaw.

Panawagan ni Goc-ong ngadto sa kagamhanan sa dakbayan nga tukoron na pagbalik ang Unit II aron ibalik ang mga stallholders niini sa ingon sila kahatagan og patas nga oportunidad.

Gawas niini, miingon si Goc-ong nga makahatag kini og kaluag sa karsada diha sa Carbon area nga dugay nang gipangandoy sa mga motorista ug ubang mga mangomprahay nga dunay mga sakyanan.

Nagkanayon si Goc-ong nga makatarunganon lang nga hatagan og pagtagad sa siyudad ang ilang sentimento tungod kay sila moreklamo ug giantus ang nagkataas nga abang sa mga stalls ug sa bayranan sa business tax.

Malaumon hinuon si Goc-ong  nga matrabaho ang Unit II sulod sa ikatulo ug kataposang termino ni Mayor Tomas Osmeña ingon man ang gisaad sa mayor nga rampa nga magdugtong sa tulo ka unit sa Carbon public market.