Mga magtutudlo ug kawani sa kagamhanan sa dakbayan sa Mandaue nga nagserbisyo sa miaging Mayo 14 nga piniliay makadawat na sa ilang honorarium nga P3,000 ug P300 nga travelling allowance karong sunod semana.
Si Norma Ceniza sa accounting office sa kagamhanan sa maong dakbayan nga gikahinabi sa Banat News mipadayag nga nakasinati og kalangan ang pag-proseso sa mga payroll sa mga magtutudlo ug mga kawani sa kagamhanan sa dakbayan nga nagsilbeng mga Board of Inspectors sa miaging piniliay.
Si Ceniza miingon nga nakasinati lang og kalangan ang pag-proseso sa mga dukumento tungod sa mga ginagmay nga kakulian.
Naglakip niini ang kakuwang sa pirma ug sayop nga mga ngalan sa mga magtutudlo ug kawani sa kagamhanan nga gisumiter kanila.
Hinuon si Ceniza miingon nga dali nilang nakurihian ang maong mga sayop sa payroll ug sa ilang appointment isip sakop sa Board of Election Inspectors ug Board of Canvasser sa miaging piniliay.