Creating opportunity for the next 5-billion people

Nagpabilin karong gawasnon ang gitumbok nga utok sa pagpayuhot ug minilyon ka pesos nga "regulated drugs" dinhi sa siyudad sa Sugbu nga si Joseph van Hemelen, Belgian national nga giingong kasamtangang nagpuyo sa barangay Talamban ning dakbayan.

Matud ni PDEA-7 director Superintendent Amado Marquez nga sa pagkakaron gipalig-on pa nila ang kaso nga ipasaka batok kang Hemelen.

Giklaro ni Marquez nga dili mahimong dakpon ang Belgian national ug labaw nang dili mahimong maluwatan ug hold departure order tungod kay wala pay kaso nga gipasaka batok kaniya.

Si Hemelen maoy gitudlo nila ni Isidra Bacang ug Rodrigo Estillore nga maoy misugo kanila pagpada sa ubay-ubay nga mga tabletas nga gihulagway sa National Bureau of Investigation (NBI-7) uban sa ubay-ubay nga mga regulated drugs sama sa valium, diha sa post office sa siyudad sa Mandaue sa sayong bahin ning semanaha.

Hinuon miingon si Marquez nga mipasalig na sila si Bacang ug Estillore pagluwat og affidavit nga magtumbok kang Hemelen nga maoy nagsugo kanila pagpada sa nahisgutang mga tabletas pinaagi sa koreo.

Wala hinuon mabalaka si Marquez nga makasibat si Hemelen gawas sa nasud human mapagya ang iyang pangalan nga maoy responsable pagpayuhot sa nahisgutang mga regulated drugs.

Matud ni Marquez nga duna silay mga paagi nga mahibalik si Hemelen dinhi sa nasud kun kini nakagawas na sa Pilipinas.

Gihimong sanglitanan ni Marquez ang giilang pinanser sa mega shabu laboratory nga si Calvin Tan nga nadala gihapon dinhi sa Sugbu bisan kun kini didto na sa Hong Kong.