Pagtahan ni Pigon taktika

Taktikang ligal sa iyang depensa ang gihimong pagtahan ni PO1 Arnulfo Pigon ngadto sa National Bureau of Investigation didto sa kaulohan samtang wala pa makagawas ang warrant of arrest niini, apan dili kini makaapekto sa napasaka ng kaso sa piskaliya sumala pang Sr. Supt. Patrocinio Comendador.

Si Pigon maoy gitumbok nga mipusil patay kang Sta.Fe mayoralty bet, Rogelio Illustrisimo, Sr. diha sa atbang sa Provincial Comelec sa Kapitolyo niadtong Mayo 2 ning tuiga.

Si Pigon mitahan ngadto sa NBI sa Manila ug midangop ngadto kang Department of Justice secretary Raul Gonzales niadtong milabayng Miyerkules.

Sa pakighinabi kagahapon kang Pigon sa DyLA kini mipasangil nga scripted lang ang pamahayag sa duha ka polis sa Criminal Investigation and Intelligence Branch nga nangangkong nakakita kaniya ug sa karibal sa politika ni Illustrisimo nga si Domingo Zaspa diha sa usa ka hotel dinhi sa dakbayan human na mapatay si Illustrisimo.

Si Comendador nagkanayon nga dili husto ang pagpadayag ni Pigon sa iyang habig pinaagi sa media kundili angayan nga adto niya kini tubagon sa piskalya ug sa korte.

Nangangkon si Pigon nga usa siya ka 'fall guy' ug napasanginlan lang apan gisalikway kini sa opisyal.

"It was an objective investigation, it was based on the evidences without any interference from anybody else…we determine the suspect and we find evidences then we filed the case," pagklaro pang Comendador.

Matud pang Comendador di makatandog sa kasong ilang nasang-at batok kang Pigon ug Zaspa ang pagtahan niini.

Samtang dili mosakay si Comendador sa hagit ni Pigon nga magpa-lie detector test sila ug mga testigos lakip na ang duha ka polis gumikan kay tua na ang kaso sa piskalya ug kung gusto niini huwaton nalang ang korte sa pagmando alang niini.

Sa samang interbyu, si Pigon mipasangil nga maong gidali-dali ang pagsang-at sa kaso tungod kini sa reward nga P1.3 milyones apan gipanghimakak kini ni Comendador ug mitubag nga migawas ang mga testigos sa wala pa ibutyag nga dunay reward.

Misumbalik si Comendador nga pipila na ka adlaw ang milabay dunay mga tawong miduol kaniya ug mipasalig nga mapasurender nila si Pigon basta klaro lang nga duna gyuy reward.

Dugang pa niya gikatahong ang maong tawo mitug-an nga magamit ang maong kwarta sa paghikay sa depensa sa kaso ni Pigon. Nunot niini nagduda si Pigon nga dunay interesado sa reward apan dili sa habig sa kapolisan.