Sundalo, Pulitiko

Pabor si Bise Gobernador Gregorio Sanchez Jr. nga adunay mahitabong eleksiyon sa mga barangay dinhi sa nasud karong Oktubre ning tuiga.

Si Sanchez miingon nga gikinahanglan nga adunay matigayon nga eleksiyon sa barangay aron matuman ang unsa nga nakalatid sa batakang balaod alang sa maong katuyoan.

Sumala pa niini nga wala siyay pagsupak kun mahinayon man karong Oktubre ning tuiga ang pagpahigayon sa eleksyon sa kabarangayan gumikan kay importante man usab kaayo nga makapili ang publiko og bag-ong mga lider sa ilang barangay tungod kay dili ikalimod nga dunay mga opisyal nga sa ilang nalantaw nga dili na epektibo sa ilang pagdumala sa katungdanan diha sa barangay.

Apan giklaro sa bise gobernador nga kun ang gobyerno walay pundo sa maong katuyoan mas maayo usab nga i-oktaba na lang una ang eleksiyon sa barangay karong Oktubre aron mahapak sa basic services ang nahibiling pundo.

Si kanhi Gobernador Pablo Garcia nga midaog pagka-kongresista sa ikaduhang distrito misaad nga kun makalingkod sa kongreso iyang iduso ang balaodnon pag-oktaba sa eleksiyon sa barangay.

Si Garcia mipasabot nga mas makaayo nga i-oktaba ang pagpahigayon sa eleksyon sa barangay ug adto sa tuig 2008 gumikan kay ang gobyerno dako na kaayo og gasto sa milaba'yng midterm election.