Motorista napasok sa bus

Gideklarar nga patay  ang usa ka lalaki human mibangga ang gimanehong motorsiklo niini sa usa ka delivery van ug napasok ang katunga sa iyang lawas dihang nalagpot kini ilawom  sa usa ka bus nga nagsunod sa maong delivery van.

Ang namatay giila nga si Martin Yunto, taga Consolacion,   samtang naangol usab ang nag-backride niini nga usa ka Michael Ybañez.

Ang maong insidente nahitabo sa  Panadtaran,  San Fernando pasado alas  10 sa buntag kagahapong adlawa.

Base sa imbestigasyon sa San Fernando Police  Station base sa asoy sa drayber sa Librando Bus Liner nga si Flordelito Escuadro, 37, taga Panlaan, Dumanjug,  ang iyang gimaneho nga sakyanan nga nagsunod  sa delivery van nga gimaneho ni Nicholas Sator, 44 anyos, taga Cabancalan,  Mandaue,  padulong sa habagatang bahin sa Sugbu.

Nakit-an ni Escuadro nga mi-overtake ang motorsiklo nga gimaneho ug gisakyan sa mga biktima sa duha ka V-hire ug mi-okupar na kini sa ilang lane.

Misuway sa paglikay ang delivery van nga dili maigo ang maong motorsiklo apan nawagtangan og pamalanse ang maong motorsiklo ug mibangga sa   delivery van. Ang drayber sa maong motorsiklo nga si Yunto nalagpot pipila ka metro ug napasok ang katunga sa lawas niini ilawom sa Librando Bus Liner.

Gisuwayan sa pagdala sa South General Hospital ang mga naangol apan gideklarar  nga dead-on-arrival si Yunto sa doktor  samtang nagpaalim pa ang kauban niini sa maong tambalan tungod sa mga kadaot sa ulo  nga iyang nahiaguman.

Samtang boluntaryo nga misurender sa kapolisan sila si Sator ug Escaudro apan gibuhian ra usab kini human makig-settle sa mga tagtungod sa mga biktima. - Undo Mark Mayol ug Gia Illustre Sanchez