Toyota seeks twice-to-beat edge vs Cebuana

Si Atty. Ferdinand Gujilde, Election Officer sa dakbayan sa Mandaue, nibutyag nga mas gubot ang eleksiyon karong tuiga sa maong dakbayan kumpara sa niaging piniliay tungod sa kadaghan nga mga reklamo nga nadawat sa ilahang opisina.

Atol sa pakighinabi sa Banat News kagahapong adlawa, niingon si  Gujilde nga adlaw pa lang sa kampanya  nakadawat na silag mga taho nga mga pagpanghulga ug pagpanghasi sa mga supporters sa managribal nga partido ingon man ang mga reklamo sa mga kandidato nga gipangtapakan ang ilahang mga posters sa ilahang mga kaatbang.

Sa lima ka adlaw nga canvassing sa maong dakbayan, makadaghan na usab nga higayon nga nangasaba siya sa mga poll watchers ug mga abogado sa magka-atbang nga partido tungod usab sa pagkwestiyon niini sa legalidad sa mga election returns sa sub-canvassing level diin adto unta sila mo-apelar sa BOC.

Hinuon, nibutyag usab si Atty. Gujilde nga mas dako karon ang turn-out sa mga botante sa maong dakbayan diin aduna kini 113, 464 o 78% sa kinatibuk-ang voting population.

Sa laing bahin, nibutyag si Police Senior Superintendent sa Mandaue City Police Office, Alexander A. Abadinas nga malinawon ang bag-o rang natapos nga eleksiyon tungod kay wala silay nadawat nga mga dagkong alarma nga adunay kalambigitan sa piniliay.

Matud pa niya, kasagarang mga taho nga ilahang nadawat kabahin sa mga supporters sa mga kandidato nga gipang harass sa ilahang mga kaatbang apan matud pa niya, wala hinuon kini makabalda aron dili madayon ang piniliay sa maong dakbayan.

Sa laing bahin, nibutyag usab si Atty. Gujilde nga bisan pa man nga ang kagamhanan sa dakbayan sa Mandaue mao ang manangtang sa mga posters ug mga campaign materials, responsibilidad gihapon kini sa mga kandidato aron mapabiling limpiyo ang siyudad sa Mandaue.