Purse bid no option for Manny

Usa ang namatay ug duha ang naangol human madat-ugi og poste nga nadumbulan sa usa ka pribadong sakyanan diha sa eskina sa dalan MJ Cuenco ug Juan Luna sa barangay  Mabolo ning dakbayan kagahapon sayo sa buntag.

Ang namatay giilang si Jovito Prado Cadavero Jr., 43 anyos, ug residente sa Sitio Zapatera Bario Luz samtang nangaangol usab sila si Larry Mahilom, 42 anyos, residente sa Holy Name sa maong barangay ug Harris Soroño, 35 anyos, nagpuyo sa barangay Santa Ana lungsod sa Barili.

Base sa imbestigasyon sa Traffic Group, nadasmagan sa Kia Sorento SUV nga gimaneho ni Ronald James Abellana Ty, 22 anyos, residente sa La Guardia Lahug, ang traffic post diha sa maong dapit ug adto napusdak sa gihimutangan sa mga biktima.

Kini human maigo ang luyong bahin sa Kia sa naghaguros nga PUJ nga gimaneho ni Ramil Ygot, 36 anyos, ang panuigon ug nagpuyo sa sitio Fatima barangay Apas.

Ang SUV padulong sa pantalan niadtong tungura samtang ang PUJ gikan sa Sugbu padulong sa Mandaue dihang nag-abot diha sa eskina sa maong dapit.

Tungod sa kakusog sa pagbangga nibaliwliw ang SUV ug nabalhin sa lane sa PUJ ug nalahos ngadto sa poste. Ang poste adto napadulong sa mga biktima nga nagpaabot niadtong tungura og masakyan.

Daling gidala ang tulo sa Perpetual Succour Hospital apan gideklarar nga patay si Cadavero samtang luwas na usab ang laing duha ka naangol.

Mitahan hinuon ang drayber sa SUV ngadto sa mga mirespondeng mga sakop sa Mabolo police station human sa hitabo.