Garcias end final grip of Yaphas, Martinezes

Arestado ang usa ka sundalo human kini mamusil sa usa sa mga batan-ong migukod kaniya diha sa sitio Brotherhood, Basak-San Nicolas kagahapon sa kaadlawon.

Ang gidakop giilang si Technical Sergeant Rogelio Escotor Altubar,  44, sakop sa Civil Relations Service sa Central Command diha sa Camp Lapulapu ning dakbayan.

Ang suspek gidakop human niya pusila si Vonray Ceniza, 23, taga sitio Kalubihan sa samang barangay kinsa naigo diha sa tuong abaga sa kalibre  .45  nga pistola ni Altubar.

Sa imbestigasyong gihimo nila ni PO3 Rogelio Nedamo sa Homicide Section ang maong sundalo unang gipasanginlang nanion og armas sa igsuon ni Ceniza nga si Noel, 22 anyos.

Apan si Altubar sa pakighinabi sa Banat News kagahapon nagkanayon nga wala niya tiuni og armas si Noel Ceniza kun dili iya ra kining gisitar tungod sa pagdala-dala niini og puspos diha sa dalan apan dunay komosyon nga nahitabo maong milakaw na lang siya aron mobalik sa kampo.

Sumala pa nga si Altubar nakainom niadtong tungora apan wala hinuon matino kung hubog ba kini dihang nahitabo ang pagpanion.

Ang mga tawong nakakita sa giingong pagpanion sa armas sa sundalo kang Noel maoy daling misumbong ngadto sa ginikanan sa gitionan kinsa mao usab ang mipahibalo sa mga barangay tanod ug mitawag og polis sa Mobile Patrol Group.

Si Altubar gigukod sa mga batan-on ug diha naabti sa daplin sa dalan duol sa usa ka tindahan diin ila kining gialirungan nga misangpot na usab sa lain pang komosyon hinungdan sa pagkapusil ni Altubar kang Vonray Ceniza.

Ang samaron daling gidala sa iyang mga kabanay ngadto sa Cebu City Medical Center ug naa na sa luwas nga kahimtang.

Hinuon daling miabot sila si PO1 Clifford Mantura ug PO1 Sir Abatayo sa car 005 sa MPG ug naaresto si Altubar. Nakuha kang Altubar ang usa ka Colt .45 caliber pistol, usa ka inside holster, tulo ka magazine, lima ka buhing bala.

Nakuha usab ang Firearms and Other Deadly Weapons Ban Exemption nga papeles nga giisyu kaniya niadtong Pebrero 28, 2007 nga pinirmahan, usa ka mission order nga pinirmahan ni Lt.Col. Oscar Lasangue, ang group commander sa  3rd Civil Relations Group sa Camp Lapulapu.

Usa ka Elmer Lobo,Sr. ang mi-turnover sa tulo ka basiyo sa .45 nga bala nga iyang napunitan diha sa duol sa iyang balay nga gikatahong gikan sa armas ni Altubar dihang mipasalba kini sa iyang armas.

Kasong frustrated homicide maoy ipasaka sa kapolisan batok sa maong sundalo.—Edwin Ian Melecio