Canvassing in south to be finished tonight

Usa ka kalabira sa tawo ang nakuykuyan diha duol sa karaang gihimutangan sa Mabolo Police Station nga kasamtangan na karong gitukuran og usa ka building nga himuong bangko.

Ang maong bukog niadto pang Abril 29 ning tuiga sa buntag nakuykuyan apan niadto lang Miyerkules gipahibalo sa kapolisan human hipusa og pipila ka adlaw diha sa maong construction site.

Ang maong bukog sa tawo nangadugmok na ug ang kalabirang ulo niini nagsugod na og kadugmok ingon man mga ngipon sumala pang PO3 Rogelio Nedamo sa Homicide Section kinsa maoy miresponde sa maong dapit..

Usa sa mga trabahador nga si Randy Ravanes Paonil kinsa nangubkob sa maong dapit maoy gikatahong nakakita sa maong kalabira diha sa ilawom.

Sumala pang Nedamo giingong gisulod ang maong kalabira sa usa ka karaan na kaayong sako dihang iyang nakuykuyan sumala pa sa pangangkon ni Paonil ngadto sa kapolisan  apan wala na makita pa nila ni Nedamo ang maong sako sanglit gikatahong natabunan na sa kinuykuyang yuta.

 Si Nedamo nagkanayon nga ang angayan untang gibuhat sa mga construction worker nga maoy nakakita sa maong kalabira ila dayong giundangan ang ilang gitrabaho sa dapit ug gipahibalo dayon ang kapolisan.

Pinaagi niini mapreserbar ang dapit ug mahimoan dayon og crime scene investigation aron pagkuhag detalye ug posibleng ebidensya nga makatabang pag-ila sa biktima ug ingon man importanteng impormasyon.

Ang maong mga bukog giturn-over na ngadto sa Scene of the Crime Operation-7 nga gipanguluhan ni SPO4 Virgilio Bagasala aron sa paghimo og dugang eksaminasyon sa bukog.

Si Bagasala sa pakighinabi sa Banat News mitug-an nga wala pa mopagawas si Dr.Benjamin Lara, ang medico legal sa PNP Crime Laboratory kung iya sa babaye o lalaki ba ang maong kalabira.

Wala pa usab matino kung unsay gikamatyan niini apan base sa hitsura sa bukog niini gibana-banang napulo na ka tuig kapin kining nalubong sa maong dapit. — EIM