Apura di druglord: Oaminal

Gipanghimakak ni Atty. Clarence Paul Oaminal, consultant sa Philippine Drugs Enforcement Agency (PDEA) ang giingong sila maoy mipakatap sa mga estorya nga si Nesy Apura, kandidata pagka-bise sa Carcar usa ka druglord.

Si Oaminal sa dihang nahinabi sa Banat News mipasabot nga "unfair" kaayo ngadto kang Apura ingon man sa buhatan sa PDEA ang maong black propaganda nga gihimo sa kaatbang ni Apura.

Matud pa ni Oaminal nga wala gyud silay kasayuran ning maong isyu ug giawhag nila ang nagreklamo batok ni Apura pagsang-at og pormal nga reklamo sa ilang buhatan ug dili angay gamiton sa propagada sa politika.

Giklaro niini nga base sa iyang personal nga nasayran wala malambigit si Apura sa ilegal nga drugas ug labaw nang wala kini sa listahan sa PDEA labot sa mga druglord sa Carcar.

Si Apura walay rekord sa PDEA, sumala pa ni Oaminal.

Nunot niini, iyang gihagit ang nagpakatap og report batok kang Apura nga mopresentar og mga ebidensya.

Si Apura maoy presidente sa Association of Barangay Council sa Carcar ug maoy higpit nga kaatbang ni Bise Mayor Roger Monteclaros.