Tulo ka kandidato sa Mandaue pulos kaayohan ang tumong

Managlahi ang paghulagway sa ilang kaugalingon sa tulo ka mga mayoralty aspirant nga sila si Jonas Cortes, Amadeo Seno Jr. ug Thadeo Jovito Jonkie Ouano kon kahatagan og kahigayonan nga mahimong mayor sa Mandaue.

Kini ilang gipadayag ngadto sa mga tigbalita atol sa media forum nga gipasiugdahan niadtong miaging adlaw.

Si mayoralty aspirant Cortes sa iyang pamahayag miingon nga iyang ipahaum ang mga pamaagi sa pagdumala sa kagamhanan sa dakbayan sa mga gihimo sa namatay niyang amahan nga si anhing mayor Demetrio Cortes Jr.

Naglakip niini ang pagpalambo sa serbisyo, pagpakita sa katawhan nga manilhig sa merkado publiko ug moapil pa sa mga enforcer nga momando sa traffic.

Si mayoralty aspirant Jonkie Ouano mipadayag usab sa pagpasubay sa pangagamhanan sa mga inilang lider sa ubang kanasuran sa kalibutan nga nahimo kining malamboon sa natad sa ekonomiya.

Matud ni Jonkie Ouano nga ang paghatag og pagtagad sa mga programa sa kabarangayan maoy makadasig sa mga kapitalista sa pagbutang sa ilang negosyo nga nagkinahanglan usab sa pag-andam sa mga lumolupyo sa ilang pagtrabaho o pagbaton og kaugalingong panginabuhian.

Samtang si acting mayor Amadeo Seno Jr., miingon nga iyang himoong modelo sa iyang panerbisyo ang iyang apohan nga si anhing mayor ug kanhi Judge Urbano Seno.

Si Acting Mayor Seno miingon nga matinud-anon ug ligdong ang ilang pagserbisyo sa katawhan ug wala magbilin og lama nga mansa sa ilang pagpangagamhanan.