Akbayan moduso og petisyon batok sa 12 ka party-list

Bisan og upat nalang ka adlaw sa dili pa ang eleksiyon karung Lunes apan desidido gyud ang militanteng pundok nga Akbayan nga mosang-at og disqualification case batok sa 12 ka mga partylist nga gihulagway nila nga front ug gipaluyohan sa Malacañang.

Nakahipos og inpormasiyon ang Akbayan nga suportado sa Malacañang ang 12 ka mga partylist human nipagawas sa mga pangalan ang Commision on Election (Comelec) sa mga nominado niini gumikan sa giluwatang kamanduan sa korte suprema subay sa giduso nga petisyon ni Akbayan Partylist Representative Loreta Rosales.

Ang mga partylist nga gitinguha sa Akbayan nga ipa-disqualify naglangkob sa Babae ka, Kakusa, Beyahing Pinoy, Ang Kasangga, Agbiac, Ahon Pinoy, Aksyon Sambayanan, Ang Bantay, Banat, Anak, Akbay Pinoy ug ang Aangat Tayo.

Matud sa Akbayan nga ang maong mga partylist angay nga taktakon sa umaabot nga piniliay tungod kay konektado sa Malacañang ang mga nominado niini ug daku ang posibilidad nga gamiton lang unya kini sa personal nga katuyoan sa administrasyon ni Presidente Gloria Macapagal Arroyo kon mahatagan og lingkoranan sa kongreso.

Gitakdang isang-at sa Akbayan ang mao nilang petisyon sulod niining semanaha sa dili pa moabot ang eleksiyon karong adlaw''ng Lunes.