Sitio Bato gideklara nga calamity area

Gideklarar na sa konseho sa siyudad sa Sugbu nga calamity area ang Sitio Bato diha sa barangay Ermita nga naigo sa sunog niadtong miaging adlaw.

Duha ka sitio diha sa nahisgotang barangay (Bato ug Katsilaan) ang apektado sa nahisgotang sunog nga miugdaw sa mga panimalay, kabtangan ug kahayopan nga igbabaligya diha sa Carbon market.

Ang chairman sa committee on social services sa city council, konsehal Gerry Carillo, maoy mipalabang og resolusyon atol sa sesyon sa konseho kagahapong adlawa alang sa maong katuyoan.

Tungod sa nahisgotang deklarasyon mahimo nang gamiton ang calamity fund sa siyudad alang sa relief ug rehabilitation effort niini diha sa apektadong dapit.

Kini sama sa pagpamalit og mga housing materials, kagamitan sa kusina, pagkaon ug uban pa nga ihinabang ngadto sa mga nasunogan.

Una nang gipadayag ni Mayor Tomas Osmeña nga dili niya palisiya ang sunog nga himoong hinungdan pagpapahawa sa mga squatter sa siyudad.

Mokapin sa 300 ka estraktura ang naugdaw sa nahisgotang sunog nga nilanat og kapin sa usa ka oras una nakontrolar sa kabomberohan.

Mikabat sa 2,500 ka tawo gikan sa dul-an sa 500 ka pamilya ang nawad-an og pinuy-anan ug anaa karon kasamtangang nagpasilong sa sports complex sa barangay Ermita.

Gibanabana sa Cebu City Fire Department nga mokantidad og kapin sa dos milyones ka pesos ang danyos sa maong kalamidad.

Nasayran gikan kang Ermita barangay captain Felicisimo Rupinta nga makaduha na naigo sa sunog ang sitio Bato diha sa nahisgotang barangay sukad niadtong tuig 1996.