Polis, kandidato gikiha’g murder

Gipasaka na ang kasong murder batok sa gunman nga usa ka polis ug kang Sta. Fe mayoralty candidate Domingo Zaspa sa Task Force Illustrisimo kagahapon nga nadungan usab sa paglubong sa gipatay nga kandidato pagkamayor nga si Rogelio Illustrisimo, Sr.

Ang gunman nga usa ka polis giilang si PO2 Arnulfo Pigon, kanhi sakop sa Special Weapons and Tactics sa Mandaue City Police Office kinsa nag-awol lima na ka tuig ang nilabay.

Si Pigon maoy gitumbok sa mga testigo nga maoy mipusil- patay kang Illustrisimo diha sa atubangang bahin sa Provincial Comelec Office niadtong Mayo 2.

Human sa pagpusil kang Illustrisimo ang suspek sumala pang Sr., Supt. Patrocinio Comendador, ang task force commander, midiretso sa usa ka dakong hotel diha sa uptown area ug gikatahong nakigkita kang Zaspa.

Matud pang Comendador duna silay mga testigong makapamatuod niini nga nag-abot sila si Zaspa ug suspek diha sa maong hotel.

Tungod niini, si Zaspa giapil sa maong kaso isip usa sa mga partisipante sa pagpatay sa kanhi mayor. Dugang pa niini mao ang affidavit sa anak ni Illustrisimo nga si Sta. Fe Mayor Roger Illustrisimo nga mitumbok nga si Zaspa diha gyud sa pagkahitabo dihang gipusil ang iyang amahan.

Si Zaspa dihang gihinabi sa usa ka lokal nga sibyaanan human sa hitabo nangangkon nga nakasakay na siya og taxi ug wala makakita sa pagpusil, apan sumala pang Comendador nakuha sa video footage sa security camera sa Kapitolyo si Zaspa nga diha pa kini atol sa pagpusil kang Illustrisimo.

"Our basis in linking Domingo Zaspa is based on the fact that he is not indicted as principal by inducement but principal by direct participation, meaning to say that the act of one is the act of all," asoy pang Comendador.

Samtang wala usab giklaro ni Comendador kung si Zaspa ba ang mastermind sa pagpatay apan dunay mga nakuhang ebidensya ug testimonya sa mga testigo nga nagtumbok sa direkta niyang partisipasyon sa krimen.

"We have already established probable cause against Zaspa and as to the link between Zaspa and the gunman we have other witnesses linking Zaspa to the crime," dugang pang Comendador.

Si Directorate for Investigative Management, Director Geary Bareas mitug-an nga dili hunongon ang manhunt operation batok sa gunman bisan pa man sa pagpasaka na sa kaso.

Atol sa operasyon pag-aresto unta kang Pigon diha sa barangay New Light sa Cawayan, Masbate niadtong Martes sa alas dos sa hapon gikatahong misukol kini ug nakaeskapo.

Ang mga sakop sa Criminal Investigation and Detection Group-7 pinanguluhan ni Chief Inspector Rex Derilo ug mga sakop sa Criminal Investigation and Intelligence Branch pinanguluhan ni Sr. Insp. George Ylanan ug Masbate police pinanguluhan ni Chief Inspector Ronald Briones.

Si Pigon gikatahong nakabantay pag-abot sa mga polis ug daling mipabuto sa iyang armas ug miikyas uban sa upat ka wala mailhing mga lalaki.

Si Pigon giingong diha nagtago sa balay sa iyang bayaw nga si Inspector Nicole Ygot nga ang luyo baybayon ug may kakahuyan diha sa kilid.

Gitun-an na karon sa kapolisan ang pagpasaka og kaso batok kang Ygot ug sa asawa niini tungod sa pagtago kang Pigon.

Narekober diha sa compound ni Ygot ang usa ka basiyo sa kalibre 45 ug usa ka magazine nga puno pa og bala nga gituuhang gikan sa miikyas nga si Pigon.