Comelec nangita''g kahulma''g generator

Nanawagan karon ang Cebu City Comelec Office ngadto sa mga pribadong kompanya sa siyudad, nga motabang alang sa pagsiguro nga limpyo ug katuohan pagpahigayon sa eleksyon dinhi sa dakbayan.

Kini pinaagi sa pagpahuwam sa ilang mga generator set atol sa eleksiyon karong Lunes, agig panagana kung dili kapugngan ang posibleng pagpawong sa sugang dagitabnon.

Matud ni City Election Officer, Attorney Marchel Sarno, nga mas maayong kapangandaman ang maong kakulian aron dili mabalda ug madudahan ang pagpahigayon sa canvassing sa election returns.

Suma ni Sarno nga ila nang gihan-ay ang plano sa ilang preparasyon sa nagkaduol nga eleksyon ug ilang nakita ang panginahanglan sa generator set.

Nagkanayon si Sarno nga dili sarang ang ilang giandam nga mga emergency lights nga isuga sa nahisgotang kalihukan kung dunay brownout.

Ang generator set maoy tukmang ibutang diha sa Ecotech Center diin anha himuon sa labing unang higayon ang canvassing sa election returns dinhi sa dakbayan.

Gipasalig na hinuon sa Visayan Electric Company kon VECO ingon man sa National Transmission Commission kon Transco nga way mahitabong brownout atol sa eleksyon.