Nunot niini si Sr. Supt. Patrocinio Comendador, direktor sa Cebu City Police Office mipagawas og direktiba sa tanang police station ug special units sa pagpatuman sa maong ordinansa.
Matud pa nga tumong sa maong ordinansa mao ang kaluwasan sa publiko ilabi na sa kabataang mopalupad sa tabanog diha sa kadalanan bunga usab sa peligro nga nagpaabot tungod sa disgrasya sa sakyanan ug kuryente.
Sa maong ordinansa, lakip sa gibawalan nga paluparan og mga tabanog gawas sa kalsada mao ang mga tulay, dagkong kalsada ug mga agianan sa mga tawo ingon man ang tanang dapit sa dakbayan nga dunay mga kable ug wirings sa kuryente ug telepono.
Dugang pa niini gibawalan usab ang mga batang ubos sa dose anyos nga makapalupad og tabanog kun walay superbisyon sa hamtong diha sa luwas nga lugar.
Miangkon ang konseho nga makalingaw ang pagpalupad sa tabanog ug mao kini usa sa mga kalingawan sa mga bata panahon sa bakasyon apan dili usab angayang igsapayan ang kaluwasan sa mga bata bunga sa pagpalupad og tabanog sa bisan asang dapit sa dakbayan nga dunay daghang sakyanan ug nagkutay nga mga wires.
Kahinumduman nga usa ka UH-1H helicopter sa Philippine Air Force ang nihagsa kapin usa na ka semana ang nakalabay diha sa dakbayan sa LapuLapu nga miresulta sa kamatayon sa siyam ka tawo.
Migawas sa imbestigasyon sa maong hitabo nga tabanog maoy hinungdan sa aksidente, base sa mga eksperto, sensitibo ang makina sa mga abyon sanglit bisan gamay''ng butang nga masulod sa makina niini momugna kini og kalayo nga dili sa hustong parte sa makina nga angayang mahitabo.
Wala hinuon maklaro kung nasulod ba sa makina sa abyon ang maong tabanog o ba kaha milikay sa tanod sa tabanog ang piloto maong didto kini nasangit sa kable sa kuryente hinungdan sa pagkahagsa niini.