Sta. Fe ug 12 ka lungsod bantayanan

Gitugyan na ngadto sa Commission on Elections (Comelec-Manila) ang pag-hukom kon angay ba nga ipaubos sa Comelec Control ang tibuok isla sa Bantayan sa eleksiyon samtang dose ka mga lungsod sa tulo ka distrito ang gibutang sa areas of immediate concern.

Gibutyag ni Comelec Provincial Supervisor Atty. Leonil Marco Castillano nga si Comelec Commissioner Ressureccion Borra ang modesisyon sa petisyon .

Nilig-on ang panawagan nga ipaubos sa Comelec control ang maong isla human gipusil patay ang kandidato pagka mayor sa lungsod sa Sta. Fe, Rogelio Illustrisimo Sr. sa Capitol compound niadtong milabay''ng semana .Sayo niini sila si Madridejos Mayor Letty Mancio, mayoralty candidate Salvador Dela Fuente, Bantayan Mayor Geralyn Escario una nang niduso og petisyon sa Comelec nga nag-awhag nga ipaubos sa Comelec control ang ilang lugar tungod sa presensya sa mga armadong tawo nga gituohang goons sa mga politiko nga nagbahas bahas sa ilang lugar.

Apil sa nisang-at og petisyon mao si Daan Bantayan mayor Maria Luisa Loot ug buot nga ang tibuok kwatro distrito ang ipailawom sa Comelec Control.

Samtang si Sr. Supt. Carmelo Valmoria, hepe sa kapolisan sa probinsya sa Sugbu nagkanayon nga nisumiter siya og rekomendasyon sa Immediate Area of Concerns diin dunay 12 ka mga lungsod sa tulo ka distrito sa lalawigan sa Sugbu.

Ang mga distrito mao ang kuwatro distrito, kinto ug tirsiro distrito tungod sa presensya sa mga rebeldeng New Peoples Army sa Communist Party of the Philippines.

Si Castillano mibutyag nga girekomendar niyang ibutang ilawom sa areas of immediate concern ang Danao City, San Remegio, Madredijos, Sta.Fe, Daanbantayan, Medellen, Tabuelan, Tabogon, Bogo, Asturias, Catmon, Borbon, Carmen, Sogod tungod sa presensya sa mga armado, init kaayong panagribal ug presensya usab sa mga rebelde base usab sa mga report sa kapolisan.