Duha nangalumos sa managlahing lugar

Duha ka tawo ang nangalumos sa managlahing dapit diin usa kanila nag-beach outing diha sa Parkey Beach Resort sa barangay Marigondon sa milabay''ng adlaw sa buntag dakbayan sa Lapu-Lapu.

Ang namatay nailhan nga si Sixto Buntilao, 29 anyos ang panuigon, walay trabaho ug residente sa sitio Matumbo, barangay Pusok sa siyudad sa Lapu-Lapu.

Sa pasiunang imbestigasyon nga gihimo sa kapolisan ang biktima kuyog sa iyang igsuon nga babaye ug higala nga nangaligo.

Matud pa ni PO3 Manolito Abellanosa nga gikahinabi sa Banat News nga ang biktima ug ang mga higala niini nag-inom samtang nangaligo sa dagat ug dihang ang biktima miadto sa kinailawman nga bahin sa dagat ug nalumos.

Matud pa ni PO3 Abellanosa nga tunga sa oras nga nawala ang biktima, una pa nakit-an.

Samtang sa laing hitabo, patay ang usa ka mananagat kinsa gituohang hubog nga naligo sa miaging hapon sa kadagatan sa Alegria, Cordova.

Ang biktima mao si Dante Degamo, 37 anyos, ulitawo nga nagpuyo sa barangay Gabi sa nahisgotang lungsod.

Si PO2 Calixto Botantan nga gikahinabi sa Banat News miingon nga kuyog sa mga silingan ang biktima nga naligo sa maong lugar ug nag-inom dangtan pila ka gutlo nananghid kining motugsaw sa dagat apan wala na kini mobalik og lutaw, dangtan kapin ang usa ka oras nga pagpangita una pa nasigpatan ang patay''ng lawas niini.