Brown-out sa Mayo 14 gipangandaman

Ang tigsuplay sa kuryente dinhi sa Metro Cebu nangandam aron masulbad dayon ang problema kun may brownout nga mahitabo sa adlaw sa election.

Kini samtang ang taga Visayas Electric Company (VECO) dili makapaniguro nga way brown-out nga mahitabo sa adlaw sa piniliay.

Matud pa ni Ethel Natira, tigpamaba sa Veco, nga sa ilang bahin isip maoy distributor sa koryente ngadto sa matag panimalay, may gitukod silang "task force" nga maoy gitahasang kun may mga lugar nga mapawngan sa kuryente.

Kini tungod kay matud pa ni Natira dili sila makakontrolar sa mga nagsuplay kanilag koryente sama sa National Transmission Commission Transco ug National Power Corporation (Napocor).

Gawas niini, si Natira nagkanayon nga naa pay daghang tabanog nga usa usab kini sa mahimong hinungdan sa kalagmitang mahitabo ang pagkapawong sa koryente.

Apan miingon si Natira nga kun ugaling mahitabo man gyud, ikapasalig nila nga dihadiha makalihok dayon ang ilang mga tawo aron pag-ayo sa dapit nga mapawngan sa suga.

Hinuon sayo niini ang mga kadagkoan sa Transco ug Napocor mipasalig nga giandam nilang daan ang mga dagko nilang makinarya sama sa mga dagkong "generator" aron paandaron dayon sa panahong mapalyar ang ilang mga linya sa koryente.

Gawas niini ang mga security guard nga gipabantay nila sa ilang mga planta kanunay nga alerto aron masanta ang mga binuang sa mga tawong buot mosurambaw sa umaabot nga election.