Gwen gi-atras ni Cris

Ang negosyante nga si Crisologo Saavedra miatras karon sa iyang kasong gipasaka batok kang Gobernador Gwendolyn Garcia labot sa mga kahiwian niini sa pagpaapil sa iyang kaliwat sa proyekto sa Cebu International Convention Center(CICC).

Kahinumduman nga niadtong milabay''ng adlaw misang-at si Saavedra sa bag-ong kaso batok kang Garcia ug sa ig-agaw niini nga si Karen Fiel Tio kinsa maoy nanag-iya sa Diamonds Interior Industry Inc. gumikan kay nakalapas kini sa Government Procurement Act dihang wala gipahibalo ang ilang relasyon og nakadaog pa sa duha ka biddings ang na award niini nga mikabat sa P9 milyones.

Si Saavedra miangkon nga usa ka ''honest mistake'' ang iyang nabuhat dihang giduso ang maong kaso batok sa gobernador ug sa ig-agaw niini human usab iyang gikasulti si Sofronio Ursal kinsa maoy writer sa libro nga iyang gi-quote sa pagsang-at og kaso subay sa libro niini nga Procurement Tool of 2006 apan dakong sayop ang pagkakopya.

Matud pa niini nga si Ursal miangkon nga nasayop ang nakalagda sa page 238 sa maong libro subay sa RA 9184 section 45 hinungdan nga iyang gibakwi ug i-modify kini.

Gidugang pa niini nga dili usab siya mangayo''g pasaylo sa gobernador sa sayop nga iyang pag-cite sa balaod gumikan kay mi-angkon man usab ang author niini nga si Ursal nga typhographical error.

Iyang giklaro nga sa pagkakaron iyang gibakwi o i-modify ang maong lakang una pa nila iduso og balik sa buhatan sa Ombudsman Visayas.

Gani mopadala usab siya''g pormal nga sulat ngadto kang Ursal aron usab makurihian niini ang libro nga na-circulate na lukop nasud.