Brownout sa eleksyon gikabalak-an

Giawhag ang National Transmission Corporation (TRANSCO) ug ang Visayan Electric Company (VECO) nga paningkamotan ang pagpangita og paagi aron segurado nga walay motumaw nga mga pag-brown out atol sa adlaw ug human sa eleksyon sa Mayo 14.

Kini human nakadawat og report ang mga opisyal sa dakbayan sa Sugbu sa mga nasinati nga mga pag-brownout sa pipila ka mga barangay dinhi sa dakbayan ilabi na panahon sa kagabhion.

Kini maoy hinungdan nga mopasar og resolusyon si Konsehal Pacaña atol sa sesyon niini karong Miyerkules nga mag-awhag sa Transco ug Veco nga seguradohon niining walay motumaw nga brown out karong tibuok bulan sa Mayo diin gitakda ang piniliay sa petsa 14.

Gipasabot sa konsehal nga gikinahanglan nga magpabiling lig-on ang suplay sa koryente dili lang dinhi sa dakbayan kon dili lakip na sa tibuok nasud atol sa pinili-ay aron sigurado nga ma-protektahan ang interes sa publiko sa ilang pagpili og mga kandidatu nga ilang botaran karung eleksyon.

Nabalaka ang konsehal nga dunay mga binuang nga motumaw panahon sa eleksyon kun dunay mga brownout nga mahitabo tungod kay maghatag kini og kahigayonan sa mga dautang elemento paghimo sa ilang mga dautang plano.

Nasayran nga una nang mipasalig ang Veco ug ang Transco nga dunay igong suplay sa kuryente atol sa adlaw sa eleksyon ilabi na gyud atol sa pagpahigayon unya sa canvassing sa mga balota diha sa matag presinto.