6 ka RHD gisakmit sa BOC

Unom ka mga luhong sakyanan nga mga right hand drive (RHD) gikan sa Japan nasakmit sa Bureau of Customs human kini buot nga ipalusot dinhi sa Sugbu.

Kagahapon sa buntag, gipangunayan ni Customs Commissioner Napoleon Morales ug Cebu Customs District Collector Ricardo Belmonte ang pagbukas sa duha ka 40-footer container van nga gialerto sa mga sakop sa Task Force on Anti Smuggling (TFAS) sa kaulohan.

Matud pa ni Belmonte human gialerto kanila sa TFAS ang duha ka mga container van gikan sa nasud sa Japan nga adunay kadudahan nga kargamento, ila dayon kining gipugngan pag-abot sa Cebu International Port (CIP) niadtong Abril 3 ning tuiga. Nasuta sa maong deklarasyon nga pulos mga "used replacement parts" alang sa trak ang sulod sa duha ka mga vans nga ang consignee niini mao ang Mayato Motors Co. sa H.Cortes, Mandaue ug Century Motors Trading sa Talisay. Nasuta nga mga tibuok nga sakyanan ang sulod niini hinungdan sa pagpugong niini nga makagawas sa CIP. Atol sa pag-abli kagahapon sa kadagkoan sa BOC nasuta usab nga mga right hand drive ang mga sakyanan diin tulo sa matag container van ang sulod niini ug gibanabana nga mokantidad sa P3 milyones ang maong kargamento. Matud pa ni Morales, ang TFAS nga ubos sa iyang buhatan padayon sa ilang kampanya pagsumpo sa smuggling dinhi sa nasud pinaagi pagpakig-coordinate tali sa mga puwerto sa BOC dinhi sa nasud.

Si Morales nagkanayon nga ang mga sindikatong smugglers sa kaulohan mihimo og mga lakang nga ipaagi kini sa ubang mga puwerto nga dili lisod ang pagpalusot niini, apan pakyas ang mga sindikato gumikan kay wala kini molampos dinhi sa Sugbo. Si Belmonte usab mipadayag nga human sa gihimong inspeksiyon ug sa pag-abandonar sa tag-iya niini nga kuhaon ang maong kargamento, ipakanaog niini ang warrant of seizure and detention samtang anaa kini natanggong sulod sa CIP.