Ms. Mandaue madayon sa Mayo 7

Mahinayon ang Miss Mandaue pageant karong Mayo 7 sa besperas sa kapistahan ni Sr. San Jose, patron sa dakbayan nga pagahimuon sa Mayo 8 sa matag tuig.

Si acting Mayor Amadeo Seno Jr., miingon nga ang title mao lamang gihapon nga dili mausab sa nangaging Miss Mandaue nga gipahigayon.

Gipasabot niya nga gihinayon na lamang ang Miss Mandaue karong tuiga dihang nakigtagbo usab kaniya si Orlando Diola kinsa personal nga mitanyag sa pag-produce sa maong proyekto.

Si Seno miingon nga dili hinuon sama ka anindot ug kamabulokon ang Miss Mandaue karong tuiga sanglit giapas na sa panahon ang pag-andam sa maong indigay sa kaanyag.

Dugang pa niya walay salapi nga gigasto ang kagamhanan sanglit gikan man sa pipila ka mga sponsor ang salapi nga gigamit alang sa maong beauty pageant.

Sa nasayran nga ang Miss Mandaue maoy mga nahan-ay nga labing dako nga kalihukan sa matag tinuig nga pangilin sa Mandaue.

Giila kining labing dako nga tigiay sa kaanyag sa Sugbu nga nakatabang sa pagpalambo sa dakbayan sa natad sa negosyo ug kultura sanglit nahimo man kining hagdanan sa kabantog sa mga nahimong hara.

Mi-resign si Marie Lollipop Ouano Dizon isip pangulo sa maong indigay sa kaanyag kinsa miingon nga gi-focus karon niya ang iyang pagtagad sa pagtabang sa kampanya kang mayoralty aspirant Thadeo Jovito "Jonkie" Ouano nga iyang manghod.

Ang mga nangapil sa maong indigay dili usab daghan sanglit wala man kaayoy nangapil nga mga contestant nga mga maanyag nga babaye nga naggikan sa uban mga lalawigan .