Benhur mipahimangno vs magtutudlo nga manikas

Miluwat og pahimangno ang kandidato sa pagka-kongresista sa ikaupat nga distrito sa lalawigan sa Sugbu, Benhur Salimbangon batok sa mga magtutudlo nga manikas atol sa eleksiyon.

Ang pahimangno ni Salimbangon giluwatan atol sa iyang pagpakigpulong atubangan sa bagang duot sa katawhan sa lungsod sa Bogo nga balwarte sa iyang kaatbang, Bogo Mayor Celestino "Tining" Martinez III.

Matud pa ni Salimbangon nga iyang gamiton ang tanan niyang mahimo nga mataral sa hukmanan ang mga magtutudlo nga mosuway sa paghugawhugaw sa resulta sa eleksiyon.

Ang mga magtutudlo maoy mosilbing sakop sa Board of Election Inspectors ug maoy moihap sa botos.

Nasayran nga sa eleksiyon sa tuig 2004, daghang namatikdan ang kampo ni Gobernador Gwendolyn Garcia nga mga tinonto sa pag-tally sa botos.

Si Garcia ug kanhi Kongresista Celestino "Junie" Martinez Jr. ang nag-atbang sa pagka-gobernador sa 2004.

Nabalaka si Salimbangon nga buhaton na usab sa mga magtutudlo sa eleksiyon karong Mayo 14 ang ilang gihimo ngadto kang Garcia.

Wala nalang gukda ni Garcia ang mga magtutudlo nga nalambigit sa maong tinonto human siya lang gihapon ang nigawas nga mananaug sa kinatibuk-an sa resulta sa eleksiyon.

Si Salimbangon nanawagan ilabi na sa iyang kaatbang nga himoon ang eleksiyon karong Mayo 14 nga limpyo ug malinawon aron pagpaminaw sa tinud-anay nga sentimento sa katawhan.