"Shabu Queen" sa Mactan nadakpan

Giilang "shabu queen" sa sitio Soong, barangay Mactan, dakbayan sa LapuLapu ang nadakpan sa kapolisan sa miaging gabii ug nasakmitan og 18 ka pakete nga may sulod nga gidudahang shabu nga wala pa matino ang gibug-aton.

Ang nadakpan giila ni SPO3 Mario Poblete mao si Laura Alegre, 46 anyos, minyo nga nagpuyo sa maong dapit kinsa nasakmitan usab og mga kahimanan sa paggamit sa maong drogas ug P1,000 nga salapi nga gituohang halin sa drogas.

Si PO3 Joseph Damasco miingon nga si Alegre ilado na sa maong dapit sa pagpayuhot og ginadiling drogas hinungdan nga gi-buy bust operation siya sa kapolisan.

Kasong kalapasan sa Republic Act 9165 kun Comprehensive Dangerous Drug Act of 2002 ang giandam na sa kapolisan nga ipasaka ngadto sa korte batok sa suspetsado.