OMBUDS IPASUSPENSONG GWEN

Kasong kriminal ug administratiba ang ipasaka sa kampo ni Gobernador Gwendolyn Garcia batok kang acting Ombudsman for the Visayas Virginia Palanca Santiago labot sa gihulagway niining malisyoso nga pamahayag sa pamantalaan nga nagduhig sa gobernador sa pagpaburot sa presyo sa gitukod nga Cebu International Convention Center (CICC).

Ang maong lakang gihimo sa gobernador subay usab sa mga nanggawas nga balita sa pamantalaan diin giduhig ang gobernador gumikan kay iyang ig-agaw ang tag-iya sa Diamond Interior Industries Corporation nga maoy nakadaog sa kontrata pagtaod sa mga metal cladding sa CICC nga nagkantidad og 7.56 milyones niadtong September 26, 2006.

Kahinumduman nga si Crisologo Saavedra kinsa maoy ni-awhag sa ombudsman nga imbestigahon usab si Carren Tio kinsa asawa sa nanag-iya sa Diamond Interior Industries Corporations nga giingong kabanay ra ni Garcia.

Si Gobernador Garcia mihulagway nga iresponsable ang gihimo ni director Santiago human kini mipadayag sa usa ka pamantalaan nga nasusama na hinuong bias ang pamahayag niini sa imbestigasyon ingon man gihusgahan nang daan ang gobernador.

Matud pa sa gobernador nga ang maong pamahayag ni Santiago usa ka pre-judgement sa iyang kaugalingon hinungdan nga karong Lunes mosang-at sila''g kaso nga criminal ug administratiba sa buhatan sa Visayas Ombudsman.

Gawas pa niini ilang awhagon ang uluhang buhatan sa Ombudsman Manila nga tangtangon sa paghupot sa imbestigasyon sa CICC ug gitinguha usab nila nga ipa-ubos sa preventive suspension human usab giingong nakalapas kini sa lagda sa rules of procedure sa buhatan sa Ombudsman.

Dugang pa sa gobernador nga tataw nga adunay bias si Santiago sa lakang niini karon gumikan kay dugay nang nibuto ang maong isyu apan hangtud karong mga panahuna wala gayud kini mopadalag sulat sa gobernador labot niini.

Gawas pa niini ang gobernador mipasabot nga wala siyay nalapas nga balaud labot sa pagpatawag og bidding diin ang Diamond Interior Industries Corporation maoy nakadaog gumikan kay si Carren Tio iyang 4th civil degree nga paryente ug kun basihan ang Republic Act no. 9184 sa Implementing Rules and Regulation niini ngadto lang sa 3rd civil degree diin tataw nga nasukwahi sa pasangil ni Saavedra nga maoy gibasehan ni Santiago.

Samtang si Santigao sa iyang bahin miklaro nga ang iyang giluwatang pamahayag nga gikasagmuyo sa gobernador wala magtumbok og tawo kun dili usa lamang ka paglantaw sa tibuok nga isyu.

Si Santigao mipasabot nga ang iya lang gihimo mao ang pagpadayag sa kinatibuk-ang lakang kun unsaon ang fact-finding investigation sa pagpahigayon maong misulti kini og, "kay makabantay nya sila."

Samtang iya usab nga ipaabot ngadto ni Saavedra ang kanunay niini pag-atubang sa mga sakop sa media bisan napasaka na niini ang reklamo sa Ombudsman.

Apan iyang giklaro nga kun ugaling ang gobernador moduso gayud sa maong kaso kabahin na kini sa risgo sa ilang trabaho gani bisan kadtong mga napildi sa kaso mosang-at man usab og kaso batok sa usa ka imbestigador. -