Chopper sa Air Force nahagsa, siyam patay

Siyam ang kumpirmadong patay human mahagsa ang usaka abyon nga gipanag-iya sa Philippine Airforce pasado alas singko kagahapon sa hapon sa barangay Humay-humay Pajo Village dakbayan sa Lapu-lapu.

Ang mga sakay Huey UI-1H 625 giila nga sila si Capt. Allan Villagarcia, Lt. Michael Imbat , Sgt. Johnny delos Reyes, Martin Gavino, gikan sa South Reclamation Project, alang sa usa ka "flying lessons." Mga tinubdan sa Banat News nakabsan sa kinabuhi sila si Embat ug Gavino sa Perpetual Soccour Hospital, ug pasado alas nuwebe kagabii, gitakda nga dag-on na sa Cebu Rolling Hills Funerary.

Sila si delos Reyes ug Villagarcia padayon pa nga gitabang sa Mactan Doctors Hospital kagabii.

Samtang ang mga sibilyan nga biktima, wala pa maila kagabii, apan matud pa sa taho, ang mga nakalas mga pasahero sa traysikol. Ang ikapito nga namatay, driver sa laing traysikol nga nalup-itan.

Si Lt. Col. Epifanio Panzo, Air Force spokesman, mibutyag nga duha ka kilometro na lang ang gilay-on sa chopper sa Mactan Airbase dihang nahagsa kini. Pasiunang taho nagkanayon nga kalit lang nga napawong ang makina sa helicopter.

Samtang ang GMA News nagkanayon nga unom sa mga namatay gikatahong labihan ang kadaot nga nahiaguman gumikan kay ang ilang gisakyan naigo sa nagtuyok pa nga palabad sa chopper.

Laing tinubdan sa Banat News miingon nga ang mga sibilyan nga namatay, nakabsan sa kinabuhi, diha diha dayon.

Nasayran nga alas 3:43 kagahapon sa hapon, duha ka Huey helicopters ang mibiya sa Mactan Airbase, ang usa mipaingon sa Consolacion ug ang usa mao ang nahagsa nga chopper nga naggikan sa SRP.

Ang abyon katapusan nga nakapadala og mensahe sa Control Tower sa Air Transportation Office, alas 5:45 aron mopahibawo nga padung na sila nga motugpa sa airbase.

Alas 5: 50, ang chopper nga naggikan sa Consolacion maoy mitino nga nahagsa ang ilang kaubang helicopter nga naggikan sa SRP.

Ang mga pasahero sa maong chopper diretso nga gidala sa Mactan Doctors Hospital. Suma pa nga katapusan nga nakuha ang co-pilot nga si Embat, sanglit mihuot siya busa gigabas pa una ang usaka bahin sa maong sakyanan.

Si Violeto Ymbong, residente sa dapit miingon nga nadungog niya nga lahi na ang tingog sa makina sa chopper, ug diretso na kini nga nasangit sa mga kuryente sa elektrisidad. Dungan niini blackout ang tibuok dakbayan kagabii sanglit nasangit ang ikog sa nahagsa nga chopper sa mga linya sa kuryente sa Mactan Electric Company.

Labihan usab kahuot ang trapiko sa lugar sanglit nagtakilid nga nagbabag ang abyon sa karsada, ug matud pa wala pa kini diretso nga giugkat sanglit nagpadayon pa ang pakisusi aron matino ang hinungdan sa pagkahagsa niini.