Pagresponde vs Guardo lehitimo

Lehitimo ang gihimong pagresponde sa mga sakop sa Cebu City Police Office ug dili harassment batok sa usa ka van nga ang sakay pag-umangkon ni congressional aspirant Jonathan Guardo niadtong Martes sa gabii diha sa V.Rama Avenue.

Si Comendador mihimakak sa pasangil nga gigamit sila sa kampo sa Bando Osmeña Pundok Kauswagan ni Mayor Tomas Osmeña ug Kongresista Antonio Cuenco.

Ang kapolisan nga miresponde gipasanginlan sa Tribu Guardo nga mi-harass kanila dihang si Lemuel Sulapas nga pag-umangkon ug suporter ni Guardo gibabagan sa kapolisan ug gitionan og armas.

Daan nang mihimakak ang mga mirespondeng opisyales sa CCPO nga sila si Inspector Wilbert Parilla, Chief Inspector Arnel Banzon ug Sr.Insp. George Ylanan nga ilang gi-harass si Sulapas.

Miklaro si Comendador nga ang ilang nadawat nga alarma kabahin sa armadong mga lalaki sakay sa usa ka kolor puti nga Starex van hinungdan nga gipadala ang mga sakop sa Mobile Patrol Group pagpangita sa maong sakyanan diha sa may V.Rama ug Sambag Uno.

Dihang wala makit-i ang maong sakyanan gideklarar dayon ang Oplan Universe diin tanang mga sakop sa MPG,CSU,special units ug SWAT ingon man mga beat patrols gipalihok hangtod nga nababagan kini diha sa maong dapit.

"It is a legitimate operation about an armed person alarm, we did it just the same as responding to ordinary armed person alarm because it is our duty to respond on all types of alarm…I would like to emphasize that the PNP is an apolitical organization," asoy pang Comendador.

Midugang si Comendador nga duna na siya''y daang direktiba sa mga sakop nga kung armadong tawo ang gialarma kinahanglan gyud ang full force sa kapolisan sa pagresponde.

"I don''t want my men get hurt during my watch because if I can''t protect my own men then how can I protect the people of Cebu," pamahayag pa ni Comendador.

Miangkon si Comendador nga sukad sa pagsugod ning kalihukan sa eleksyon nakadawat na sila og daghang mga report kabahin sa mga armadong tawo nga mangabot dinhi nga giingong suporter sa mga kandidato ug ang uban posible usab mga tulisan apan wala pa nila kini makumpirmar hinungdan nga mas aktibo sila pagresponde sa matag alarma karon.