Canvassing ipabalhin ni Sarno sa Ecotech

Ang kadagkoan sa Commission on Elections sa dakbayan sa Sugbu mihangyo sa buhatan sa Comelec-Manila nga ibalhin ang canvassing sa mga balota karong eleksiyon sa Mayo gikan sa Sanggunian Panlungsod Session Hall ngadto sa Ecotech diha sa Sudlon, Lahug ning dakbayan.

Sa usa ka pahinang sulat ni Atty. Marchel Sarno, election officer sa dakbayan nga gipetsahan kini niadtong Abril 24, ning buwan nga gi-address usab ngadto kang Commissioner Resurreccion Borra gipasabot nga gamay ra kaayo ang bag-ong gi-okupahan nga Legislative Building.

Kini tungod kay ang karaang Legislative Building gipaubos karon sa renovation hangtud ning mga panahona hinungdan nga sa kagamay sa kasamtangang Session Hall sa Sangunian Panlungsod dili masulod ang 22 ka Sub-Canvassing Committee.