Jonkie gihataga’g 72-oras sa Comelec

Si mayoralty candidate Thadeo Jovito Jonkie Ouano gihatagan og 72 ka oras alang sa pagtubag sa kasong disqualification nga gisang-at sa Commission on Elections ni Zoilo Cortes nga uyoan ni mayoralty candidate Jonas Cortes.

Si Comelec 7 Regional Director Rene Buac mimando kagahapon pagpatubag sa pasangil sa citizenship ni Ouano nga giingon nga Amerikano ug dili kuwalipikado nga kandidato kay dili man kini Pilipino. Human niini, himuon dayon ang hearing.

Hinuon si Ouano sa iyang tubag miingon nga kumpleto siya sa mga dokumento sanglit ila kining gipangandaman kay maoy ilang pagtuo nga gamiton kini sa mga kaatbang nila sa politika.

Si Power Team 4 Spokesperson Antero "Jun" Cana sa iyang press statement miingon nga ang maong lakang maoy pamaagi sa politika nga tinalawan kinsa nagsalimuang na sa maangkon nga kapildihan sa May 14 nga eleksiyon.

Ang labing maayong lakang nga pagahimuon sa oposisyon mao ang pagpa-eksamin sa psychiatrist aron pagseguro sa administration party nga dili kulang ang pangisip sa kaatbang nilang mga kandidato ug nagbaton sa kinaiya sa mga kriminal.

Gikataw-an lang ni Caña ang lakang ni mayoralty candidate Jonas Cortes isip paagi alang sa giangkon daan niining kaparutan batok sa kandidatura ni Jonkie Ouano.

Matud pa ni Caña nga sa mga survey nga gihimo sa mga independent groups maoy nagpakita nga ilampaso sa kapildihan ang kandidatura ni Cortes batok ni Ouano.

Dugang pa niya nga gihugopan sa pagsuporta sa mga batan-on ug mga hingkod na ang panuigon nga mga botante ang kandidatura ni Jonkie sanglit mao lamang kini ang makapresentar ug makapasabot sa ilang plataporma de gobyerno.

Si Caña miingon nga sama nga limpyo ug makiangayon nga piniliay walay Cortes nga modaug batok kang Jonkie maoy hinungdan nga ang ilang gihimo mao ang paghikaw na lamang sa pag-apil sa iyang kandidatura. — Uban sa report ni Guam Logroño