Cuenco labaw sa south survey

Naglabaw si Kongresista Antonio Cuenco sa labing ulahing gipahigayong survey batok sa iyang challenger nga si Jonathan Guardo alang sa pagka kongresista sa south district sa eleksiyon karong Mayo 14.

Sa maong survey nga gipahigayon niining bulana niadtong milabay''ng semana si Cuenco nakakuha og 70 porsyento itandi sa nakuha ni Guardo nga duna lay 30 porsiyento.

Si Cuenco nga dihang nahinabi sa Banat News mibutyag nga independente ang maong grupo nga mipahigayon og survey sa mga kabaranggayan sa south district.

Gihulagway sa kongresista nga nagpasabot lang kini nga wala siya maapektuhi sa mga daghang pasangil ug reklamo nga giduso ni Guardo batuk kaniya sa buhatan sa Comelec.

Matud sa kongresista nakahibalo na ang iyang mga kaatbang sa politika sa padayon niyang paglabaw sa bisan asang lugar sa mga barangay sa south district hinungdan nga kanunay kining nagmaniobra og mga negatibong isyo batok kaniya.

Usa sa isyu batok ni Cuenco mao ang laing reklamo nga gisang-at ni Guardo kagahapon kabahin sa pagpang-apod apod niya og mga health cards sa kabaranggayan nga alang ni Cuenco wala mahinayon tungod kay wala motugot niini ang Comelec.

Niadtong miaging semana misang-at usab og petisyon si Guardo sa Comelec nga nag-awhag nga ipa-ubos sa Comelec Control ang mga bukirang barangay karong eleksyon tungod sa presensya sa mga armadong tawo.