Jonkie ipa-DQ kay kano

Nag-atubang karon og dakong problema si mayoral aspirant Thadeo Jovito "Jonkie" Ouano tungod sa kasong "disqualification" nga gisang-at sa usa ka residente sa dakbayan sa Mandaue didto sa Commission on Elections sa kauluhan.

Ang disqualification case batok ni Ouano nga gisang-at ni Zoilo Cortes, residente sa Cortes Compound, Alang-alang, Mandaue, nadawat sa Comelec niadtong Abril 23, 2007 sa alas 4:30 sa hapon.

Ang unom ka pahina nga petisyon ni Cortes nagkanayon nga si Ouano kanhi Pilipino nga mi-aplay og na-"naturalized citizen" sa Estados Unidos.

Si Cortes, pinaagi sa iyang mga abogado Briccio Boholst, Francisco Amit Jr. ug Rod Francis Bagaslao, miawhag sa Comelec nga ipadeklarar si Ouano nga dili kuwalipikado sa iyang kandidatura ug ipakanselar ang iyang certificate of candidacy, pamanduan ang mga Board of Election Inspectors ug Board of Canvassers sa dili pag-ihap sa balota nga Ouano.

"As such he has pledged allegiance to the US thereby in the process forfeiting his citizenship of the Philippines. His naturalization as a citizen of the United States of America likewise entitled him to become a permanent resident of said country," sumala pa sa petisyon ni Cortes.

Sumala pa niini nga nahimong American citizen si Ouano sa wala pa mapatuman ang Akta Republika 9225 (Citizenship Retention and Re-acquisition Law of 2003).

Dugang pa niini nga si Ouano mibalik dinhi sa nasud ug narehistro isip "alien" kun langyaw ug giisyuhan og Alien Certificate of Registration (ACR) ug Immigrant Certificate of Residence (ICR).

Tungod niini, ang petisyon ni Cortes nagkanayon nga dili kuwalipikado nga modagan pagka-mayor sa Mandaue si Ouano tungod kay ubos sa Local Government Code (R.A. 7160), ang mapiling lokal nga opisyal kinahanglang "citizen" sa Pilipinas ug rehistrado nga botante sa siyudad asa siya magpapili ug residente niini sulod sa usa ka tuig sa dili pa ang adlaw sa eleksyion.

Ang samang balaod, matud sa petisyon, nagkanayon nga kadtong "dual citizenship" ug permanenting residente sa gawas sa nasud ug kadtong nahatagang makapuyo sa abroad diskuwalipikado nang modagan og elective local position.

Matud pa niini nga si Ouano mibalik dinhi ug mi-aplay sa Bureau of Immigration and Deportation aron ipakanselar ang iyang ACR ug ICR aron makuha og balik ang iyang Filipino citizenship ug mahimong kuwalipikado nga modagan pagka-mayor.

Gitugotan na unta sa BID ang aplikasyon ni Ouano, apan sumala pa niini nga napakyas si Ouano

ug wala mopadayon sa aplikasyon aron mahimong "dual citizen" nga gitugot sa nasud. "He has not complied fully with the provisions of the Citizenship Retention and Re-acquisition Law, which provides for the conditions on how a former Filipino may be able to validly run for an elective position."

Si Ouano, sa iyang bahin nagkanayon nga gi-renounce na niya ang iyang American citizenship sa Marso miagi pang tuig. Gani, nahimong emosyonal ang pag-atubang ni Ouano sa embahada sa Estados Unidos tungod kay naghunahuna kini nga dili na mabalik niya ang pagka-Amerikano.

Sa petisyon ni Cortes, gitataw usab niini nga namakak si Ouano sa iyang certificate of candidacy sa dihang mideklarar nga "natural born Filipino citizen.

Si Ouano, sumala pa sa petisyon, wala makakuha sa kuwalipikasyon tungod sa pagkawagtang sa iyang pagka-Pilipino " when he renounced it by pledging allegiance to and becoming an American citizen" ug wala kini makasang-at og personal ug pinanumpaang "renunciation" sa iyang pagka-Amerikano.

Ang petisyon nangayo usab og danyos gikan ni Ouano.