Jonkie di moatras vs. Cortes

Si Mayoralty Candidate Jonas Cortes namakak dihang namahayag kini nga moatras na si Mayoralty Candidate Thadeo Jovito Jonkie Ouano sa Mayo 14, 2007 eleksiyon ug hulipan ni kanhi Mayor Alfredo Ouano.

Kini ang gipadayag ni Nerito Rey Martinez, tigpamaba ni Mayor Thadeo Ouano isip reaksiyon sa gipadayag ni Cortes sa Banat News.

Matud pa niya nga gibalit-ad lang ni Mayoralty Candidate Cortes ang kamatuoran sanglit nakamatikod man nga maoy masugamak sa kaparutan.

Giklaro ni Martinez nga dili na mailad ang mga Mandauehanon sanglit ang kampo ni Cortes mao man ang line-up sa mga kandidato nga dili matinud-anon sa ilang mga kaugalingon.

Dugang pa niya nga ang tataw nga nahadlok nga maangkon ang kaparutan mao si Cortes sanglit ang backyard gardening man lang ang ikapresentar nga programa nga dili na mohaum sa usa ka highly urbanized nga dapit nga sama sa dakbayan.

Kini maoy gituohang hinungdan nga wala kini motambong sa media forum nga gipasiugdahan sa ABS- CBN nga gipahigayon sa SM City nga gidumala sa host nga si Leo Lastimosa.

Mikakak si Cortes sa pag-atubang sa media forum ug nagpadala lamang kini og mga tawo nga mopadangat og mga pangutana ngadto kang Jonkie Ouano kinsa nanglakaw lang dayon human makumbinsir sa mga tubag niini.

Napakyas si Cortes sa pagtambong sa maong media forum bisan kun gikumpirmar pa niini ang pagtambong.

Si Martinez miingon nga si Jonkie Ouano madasigon nga gihugopan sa mga Mandauehanon sa iyang pagsuroysuroy nga gihimo sa 27 ka barangay sa dakbayan.

Kini maoy dakong sukwahi sa gipasigarbo nga kadaugan ni Cortes sa pag-house to house nga gihimo.