17 ka paketeng shabu nasakmit sa PNP

Nasikop sa kapolisan sa Danao pinangulohan ni Police Superintendent Larson Dechino hepe sa kapolisan sa maong dakbayan ang usa ka suspetsadong pusher niadtong Biyernes sa gabii diha sa Barangay Maslog,Danao.

Ang suspetsado giila sa mga polis nga si Cesar Gica Nuñez, 22, ulitawo, walay trabaho, residente sa nahisgutang lugar.

Dala sa mga polis nga misikop ni Nuñez ang search warrant nga giluwatan ni Regional Trial Court (RTC) Judge Edito Enemesio sa Branch 25 Danao City.

Ang mga polis nakasakmit og 17 ka paketeng shabu nga motimbang og duha ka gramo gikan ni Nuñez atol sa pagpangronda.

Si SPO3 Edgar Gomez, duty desk officer sa kapolisan sa Danao mibutyag kagahapon sa Banat News nga si Nuñez natala sa ilang watchlist ug gipanid-an una nila kini sa wala pa ipahigayon ang nahisgutang pagpangronda.