Kanhi koronel sa PNP gikawatan sa anak

Usa ka retiradong koronel sa polis ang mipa-blotter sa kapolisan sa Talisay diha sa Barangay Poblacion ug mipasangil nga gikawatan siya og unay sa iyang anak kagahapon sa kadlawon diha sa Gold Street, Fairview Village, Lawaan II dakbayan sa Talisay.

Ang biktima giila sa mga polis nga si retired Police Superintendent Venancio Labiano ug ang asawa niining si Marilyn.

Ang mga suspetsado kinsa nasikop sa mga polis mao si Mario Labiano alyas "Gegel", 28, walay trabaho, nagpuyo diha sa Barangay Paknaan dakbayan sa Mandaue, anak sa mga biktima ug Dennis Ybañez, alyas "Insik", 33, ug wala usab kini trabaho, taga Duljo Fatima niining dakbayan.

Naabtan nila ni SPO3 Ricardo Viacrusis, SPO1 Pablito Zoilo, SPO1 Ricardo Balbutin, PO3 Onopre Pequero, PO3 Edwin Alavarado ug PO2 Roy Sarsaba si Gegel ug Insik nga nanghakot sa mga butang diha sulod sa balay sa magtiayong Labiano.

Base sa imbestigasyon sa nahisgutang mga polis nga si Gegel ug Insik miguba sa pultahan sa likod nga bahin sa balay sa magtiayong Labiano diin diha kini miagi paingon sa sulod.

Usa ka Edwin Gerbacio, security guard sa Silence Security Agency ug nadestino sa maong lugar ang mibutyag ngadto sa mga polis nga si Gegel ug Insik mao gihapon ang suspetsado sa pagpangawat diha gihapon sa balay sa magtiayong Labiano niadtong petsa 17 niining buwana ug ang mga butang nga ilang nakuha gisakay nila sa usa ka taxi.

Si Insik ug Gegel nagtingkagol karon diha sa Talisay police detention cell.