Kandidato patay sa heat-stroke

Usa ka abogado nga re-electionist pagka konsehal ang namatay human ma-heat stroke dihang nag house -to-house og pangampanya sa miaging adlaw diha sa Okoy, Santa Fe.

Base sa taho nga nidangat sa Provincial Police ang namatay giila nga si Atty. Ladislao Gerra, minyo, usa ka retiradong kawani sa Civil Service Commission kinsa magpasubli pag-usab isip konsehal sa lungsod sa Santa Fe.

Ang biktima unang gidala sa Rural Health Unit sa Sta. Fe apan pipila ka gutlo ang nilabay ang medical staff sa maong Rural Health Unit daling mipabalhin kaniya ngadto sa Bantayan District Hospital diin siya gideklarar sa mga mananambal nga patay na dihang naabot.

Si Atty. Ladislao mikandidato pag-usab sa iya untang ikaduhang termino ug maoy usa sa mga konsehal nga anaa sa kampo ni Rogelio Illustrisimo.

Matud sa kapolisan si Atty. Ladislao nangampanya sa mga lumolupyo sa barangay Okoy apan kalit lang kining "mi-collapse" tungod sa grabeng kainit sa adlaw ug natumba sa yuta nga nawagtangan sa iyang panimuot.

Ang mga residente sa nahisgutang barangay, usa na niini ang magtiayong Marichu Marce ug iyang bana maoy nakasaksi sa maong insidente ug daling nitabang sa maong abogado ug midala kaniya sa Rural Health Unit. — Uban sa report ni Romeo T. Limpangog