Kon. Bucao mikwestiyon sa legalidad sa landfill

Gikwestiyon niadtong Huwebes sa buntag ni Konsehal Alan Bucao atol sa gipahigayong sesyon sa konseho sa Talisay ang legalidad sa bag-ong landfill diha sa Barangay Tapul.

Ang nahisgutang landfill wala pa mahatagi og Environmental Certificate Compliance tungod kay wala pa mapanag-iya ang luna niini nga dunay gilapdong siyam ka ektarya.

Gikwestiyon usab ni Bucao ang gigama nga Memorandum of Agreement (MOA) tali sa Talisay ug lungsod sa Minglanilla nga pwede kining makalabay sa ilang basura diha sa landfill sa Tapul.

Ang nahisgutang MOA gipangamahanan ni Konsehal Bernard Joseph Odilao kinsa tsirman sa Committee on Environment Protection and Natural Resources.

Kahinumduman nga usa ka sakop sa DENR kinsa nagdumili sa pagpaila sa iyang ngalan ang mibutyag nga ilegal ang gibuhat sa Talisay paggamit sa landfill tungod kay wala pa kini ECC gikan sa ilang buhatan.

Ang MOA nga gipangamahan ni Odilao gipahikling una kini para sa dugang nga pagtuon.

Si Christine Homez, hepe sa City Planning Development Coordinator ug miyembro sa Ecological Solid Waste Management Board mibutyag sa Banat News nga gitrabaho na sa Talisay ang mga dokumento para mapalit na sa siyudad ang nahisgutang luna sa landfill.

Ang maong luna gipanag-iya sa pamilyang Baclay, Luwa ug Pintor ug gibaligya kini ngadto sa dakbayan og P350 matag metro kwadrado.

Matud ni Homez nga niadtong Enero tuig 2006 natukod ang landfill ug nasugdan na kini og gamit sa siyudad.

Si Homez midungag nga wala pa gyud maaprobahi ang ECC sa landfill tungod kay wala pa mapanag-iya sa siyudad nga maoy usa sa mga rekisitos sa DENR.