Hepe sa polis mihigpit sa pagpagamit sa sakyanan

Si Police Superintendent Romeo Perigo hepe sa kapolisan sa Talisay mibutyag nga matag gabii dili niya ipagamit ang duha ka Nissan Terrano nga sakyanan sa polis para maampingan ang maong butang.

Matud ni Perigo sa pakighinabi niini sa Banat News kagahapon nga ang nahisgutang mga Terrano aduna kini mga sibilyan nga drayber kinsa ang nahisgutang mga drayber gikuha sa siyudad para maoy momaneho sa maong mga sakyanan ug magmentenar niini.

Ang hepe nagkanayon nga mihangyo na siya sa siyudad nga magkuha og laing duha ka drayber nga maoy momaneho sa nahisgutang mga sakyanan inig ka gabii.

Si Perigo nagkanayon nga iyang naobserbahan nga upat na ka sakyanan ang naguba.

Sa paglingkod ni Perigo isip hepe sa Talisay sa milabay''ng tuig adunay upat ka sakyanan sa polis ang siyudad diin tulo niini multicab ug usa ang mini van apan ang maong mga sakyanan wala maampingi sa mogamit niini hinungdan nga nangaguba.

"Wala man kaayo maampingi ang mga sakyanan, so sa adlaw daghan man ang trabaho kanang upat ka sakyanan pwede nilang gamiton, sa gabii kana na lang duha ang Mitsubishi jeep ug ang rock star jeep, I think that is enough for them" sa hepe pa.

Sa traffic division diha sa Tabunok adunay usa ka multicab, rock star jeep ug upat ka motorsiklo.

"I do not think nga ang pag-amping nato sa sakyanan is an issue, kining atong mga tawo kung patuyangan nato na sila layo ra ang usa ka tuig kining mga sakyanana manglubog ni" matud ni Perigo.

Kahinumduman nga adunay mga taho nga usa lang ka dayan-dayan ang mga sakyanan nga Terrano sa polis tungod kay dili kini ipagamit ug ang ipagamit sa operasyon ang sakyanan nga gubaon.

Si Perigo mibutyag usab nga adunay mga polis nga mogamit sa sakyanan diin pahubsan lang kini sa tubig ug asayte ug usa kini ka kalapasan apan dili mapasakaan niya og reklamo tungod kay magtudtud na man kini kung kinsay migamit sa sakyanan.

Si Perigo midungag nga aduna pay usa ka insidente nga nahitabo sa milabay''ng tuig nga usa nila ka sakyanan ang gibiyaan sa polis nga nagdala niini diha sa Barangay Cansojong tungod kay wala na modagan kay nahubas ang gasolina.