Kap, tresurera sa Pasil gi-ombuds sa 2 kagawad

Nag-atubang karon og kasong pagpangawkaw sa Office of the Ombudsman Visayas ang kapitan ug tresurera sa barangay Pasil tungod sa wala ma-liquidate nga kinitaan sa water refilling station nga gipanag-iya ug gidumala sa barangay.

Sila si Kapitan Romeo Ocarol Sr. ug ang tresurera nga si Corazon Veloso gipasakaan og kasong kriminal ug administratiba ngadto sa Ombudsman sa duha ka kagawad sa Pasil nga sila si Almario Bitang ug Ranulfo Abejo.

Kini human nasuta sa report sa Commission on Audit nga napakyas silang Ocarol ug Veloso pagsagop og saktong sistema sa accounting sa patubig, ilabi na ang pag-isyu og resibo alang sa nabaligyang tubig ug mga disbursement vouchers sa nagasto niini.

Sumala pa sa report nga wala na masubay ang kinatibuk-ang kita sa water refilling station sa Pasil gumikan sa mga sayop nga pamaagi sa kapitan ug tresurera nga ilang gipadayon og sagop bisan pa sa mosyon nilang Bitang ug Abejo nga ipatarong ang accounting niini.

Ang report ni Audit Team Leader Grace Flores ug Evita Apostol sa COA niadtong Agosto 8, 2006, nagkanayon nga ang "income" sa water refilling station sa barangay wala ma-rekord sa barangay cashbook nga gihulagway nilang kalapasan sa Section 63, Presidential Decree 1445.

"The operation of the Pasil Water Refilling Station was likened to a private enterprise by Veloso and Ocarol Sr.," sumala pa sa COA report.

Si COA Regional Cluster Director Helen Hilayo misumiter og report ni Ocarol niadtong Mayo 31, 2006 sa resulta sa audit sa "accounts and operations" sa Pasil sa tuig nga natapos niadtong Disyembre 31, 2005 diin na-obserbahan nga ang barangay mikita unta og P166,858.52 sa water refilling station nga wala maisyuhi og opisyal nga resibo ug wala madeposito sa opisyal nga bangko sa barangay nga kalapasan sa Barangay Accounting Manual.

Sa buwag nga audit report sa COA sa Hunyo 1, 2001 ngadto sa Pebrero 23, 2004, mokabat og P804,720.80 sa kita ang na-report apan wala ma-rekord sa cashbook sa barangay.

Si Bitang sa iyang bahin nagkanayon nga mibarog siya ug si Abejo batok sa "mismanagement" ni Ocarol sa barangay aron pagtuman sa mandato sa katawhan pagseguro nga ang salapi nga iya sa mga konstituwente matarong og account.

Gumikan sa ilang pagkuwestiyon niini, si Bitang gihuboan sa iyang pagka-chairman sa Committee on Finance samtang si Abejo sa Committee on Sports.

"It''s purely political harassment they doesn''t deserve the attention of the Pasil constituents who are adversely and directly affected with the scam," sumala pa ni Bitang kinsa kanhi photojournalist.