Kini human siya pasakai og petisyon ni Mayor Sheffered Tan sa buhatan sa Commission on Elections gumikan sa kakuwang og pinuy-anan ni Rabusa sa maong lugar.
Ang mga tigpaluyo ni Tan ang nabalaka usab sa hulga ni Rabusa nga iyang gamiton ang iyang impluwensiya sa militar sa pagpanghadlok sa mga botante.
Si Rabusa wala na’y klarong pwesto sa militar sukad siya gisuspenso ug gipasakaan og kaso sa Ombudsman for the Military gumikan sa iyang paghipos og kadudahang bahandi.
Si Rabusa nalambigit sa dakung anomaliya sa Armed Forces of the Philippines sa dihang nabulgar ang tinagoang bahandi nilang AFP comptroller Gen. Jacinto Ligot ug sa iyang nasundan nga si Lt. Gen. Carlos Garcia.
Si Rabusa maoy chief budget officer sa AFP deputy chief of staff niadtong 1999 hangtud 2002.
Ang Office of the Deputy Ombudsman for the Military and Other Law Enforcement Offices ang nisang-at na sa graft charges batok kang Rabusa human nahipos ang lig-ong mga ebidensiya sa giingong ilegal nga pagbaton og P43-milyones nga balor sa bahandi nga dili masubay sa iyang sweldo ug kinitaan.
Nag-atubang usab og kasong perjury si Rabusa sa kapakyas sa pagdeklarar sa tinuod nga assets and liabilities diin P618,000 lang sa tuig 1990 ug nahimo na kining P7.2-milyones sa 2003.
Si Rabusa giingong nanag-iya usab og minilyon nga kantidad sa mga panimaye ug 11 ka luhong mga sakyanan ug minilyon nga dolyares nga premium sa insurance sa duha niya ka anak nga tua sa Amerika.
Ang kampo ni Tan nagtoo nga nisulod si Rabusa sa politika sa pamasin nga modaug kini og mawagtang na ang iyang kaso ug gawasnon na siya nga makabiyahe sa gawas sa nasud.