Campaign materials ipatangtang ni Seno

Gitinguha ni Acting Mayor Amadeo Seno Jr. ang pagpatangtang sa mga poster ug uban pang matang sa campaign materials nga gipahimutang sa mga lugar nga wala ideklara sa Comelec nga common poster area.

Tumong ni Seno ang pagmentinar sa kalimpiyo sa palibot sa dakbayan.

Si Seno miingon nga ang lagda sa Comelec alang sa pagpahimutang sa ilang mga poster ug mga campaign material mao ang pagpahimutang lamang niini sa mga common poster area.

Misukwahi na sa namatikdan karon sa dakbayan nga may mga poster nga gipahimutang sa ibabaw sa kahoy ug mga lugar nga dili sa gobiyerno ug wala ideklarar nga common poster area.

Si Comelec City Atty. Ferdinand Gujilde sa dakbayan sa Mandaue nga gikahinabi sa Banat News miingon nga ang ideklara nga common poster area mao lamang ang kabutangan sa mga campaign materials sa mga kandidato.

Dugang ni Gujilde nga ang mga polis ug mga barangay tanod maoy adunay kaakohan alang sa pagtuman sa mga lagda nga gipatuman sa dakbayan nga mao ang kalimpiyo.

Si Mayor Thadeo Ouano kinsa nasuspenso sa iyang katungdanan miingon nga ang labing gikinahanglan gyud unta ang pagmentinar sa kalimpiyo sa malamboon nga dakbayan.