Lungkab sa barangay hall inside job

Gidudahan sa kapolisan sa Theft and Robbery Section sa Lapu-Lapu nga inside job ang nahitabong pagpanglungkab sa barangay hall sa Punta Engaño sa milabay’ng adlaw.

Base sa imbestigasyon ni PO2 Elmer Canillo sa TRS, nasuta nga walay nakitang lama sa pinugos nga pagsulod sa wala mailhing kawatan sa pultahan ug bintana sa buhatan sa barangay secretary diin didto gipugos og abli ang steel cabinet ug nakuha ang P30 mil lakip na ang usa ka TV. Matud pa ni PO2 Canillo nga sila nagduda nga didto miagi sa kisame ang kawatan ug gitouhan nga suhito sa maong dapit ang kawatan. Samtang si Kapitan Angel Rodriguez sa Punta Engaño nagtuo nga usa ka pekeng yawe ang gigamit sa kawatan sa pagsulod sa ilang opisina ug gumikan niini iyang gipangasab-an ang iyang mga sakop nganong walay usa nga nakabantay sa maong panghitabo diin gibanabana nga alas 8:30 sa buntag nahitabo ang pagpangawat.

Gumikan niini, ang TRS nagpahigayon og finger-printing sa tanang mga personnel nga nagtrabaho sa barangay hall alang sa pagtino sa responsable niini.