Wala nay patay makabotar – Abalos

Gisaad ni Comelec Chairman Benjamin Abalos nga wala nay mga patay nga makabotar ning umaabot nga election sa Mayo 14.

Gikataho nga lakip ang maong mga patay sa kapin usa ka milyon ka botanteng gipapas sa listahan sa mga botante sa tibuok nasud.

Matud ni Abalos nga nagpasalamat siya sa mga tinugyanan sa Registrar’s office sa matag lungsod ug siyudad sa nasud kinsa miayuda sa taga Comelec pinaagi sa pagpahigayon sa listahan sa mga tawong patay na sa ilang tagsa-tagsa ka lugar.

Ang gipapas nga mga ngalan gikan sa listahan sa Comelec sa tibuok nasud naglakip sa mga tawong wala na makabotar sa duha ka nagsunod nga election gikan sa 2001 hangtud sa 2004 ug kadtong tanang ngalan nga may "death certificate" gikan sa mga buhatan sa registrar sa lungsod ug siyudad.

Si Abalos kinsa gisukitsukit sa mga tigbalita atol sa "Kapihan ng Bayan" program sa Radyo ng Bayan nagkanayon nga ila lang giantos ang pagduda sa katawhan nga mga opisyal sa Comelec ang mipabotar sa mga tawong patay sa milabay nga mga election.

Si Abalos mitataw nga dili gyud mismo mga patay ang mibangon sa lubnganan aron lang mosalmot sa piniliay kundili mga malditong kandidato nga mipabahag kuwarta aron nga ikasuhol nila niadtong mga tawong maoy mopasar sa boto sa ngalan sa mga tawong patay na.

Alang kang Abalos, karong wala nay listahan sa mga namatay diha sa talaan sa mga botante, masiguro niya nga limpyo na kaayo ang umaabot nga election.

Mahimong maglabad na ang ulo sa mga kandidato ilabi na niadtong nagsalig lang sa mga ngalan sa mga minatay kay wala nay makabotar nga patay pabor kanila.

Hinuon miingon si Abalos nga dili gihapon sila mokompiyansa ning panahona.